Kunnskapsprosjekt om kulturarv

Rapporten frå forprosjektfasen, Museum, arkiv og samfunn - kunnskapsbehov og utfordringar av sosialantropolog Tone Fredriksen Ydse, kom ut i Kulturrådets skriftserie hausten 2007.

Forutan å drøfte aktuelle kunnskapsbehov, kastar rapporten lys over nye utfordringar kulturarvinstitusjonane står overfor i dag, og lanserer ei rekkje forslag til det vidare arbeidet.

For å følgje opp utfordringane som er løfta fram i Ydse sin rapport frå forprosjektet, går no Kulturrådet og ABM-utvikling inn for ei vidareføring av satsinga i form av eit større kunnskapsprosjekt. Prosjektet vil ha som mål å vitalisere kunnskapsproduksjonen omkring museum og arkiv.

Initiativet kjem i ei tid med brei semje om at det er behov for ny kunnskap om kulturarvinstitusjonanes rolle og virkemåte. Nye fenomen og tema dukkar i raskt tempo opp på den historiske scena, og nye føringar gjeld for både formidling og kunnskapsproduksjon. Det dreier seg først og fremst om forhold knytta til teknologiutvikling, globalisering, migrasjon og miljøutfordringar. Kulturarvinstitusjonane er sjølv ein del av denne utviklinga. Dei tek i bruk nye teknologiar som får konsekvensar både for arbeidsoppgåver og organisatoriske forhold. Dei har fått nye samfunnsroller som er lite kartlagt, og som i liten grad har vore gjenstand for refleksjon.

- Det nye kunnskapsprosjektet må sjåast i lys av Kulturrådets mål om å leggje til rette for refleksjon og debatt rundt kulturarvinstitusjonenes institusjonelle vilkår og verdigrunnlag, og å styrkje samarbeidet mellom dei ulike aktørane på feltet. Det er elles positivt at det fruktbare samarbeidet mellom Kulturrådet og ABM-utvikling frå forprosjektfasen blir vidareført, seier rådgjevar Stig Johan Kalvatn.

Kulturrådets representantar i referansegruppa til forprosjektfasen har vore Roger Erlandsen (Kulturvernutvalet) og Odd Are Berkaak (FoU-utvalet)

Kulturrådet har løyvd kr 200 000 kroner til oppstart av prosjektet i 2008.

KAFF
Parallelt med utgreiingsarbeidet er det tatt ulike initiativ med tanke på å vitalisere kunnskapssituasjonen på kulturvernfeltet som heilskap. Eit av desse er prosjektet Forskning og formidling av kulturarv (KAFF), som er eit samarbeid mellom ABM-utvikling, Riksantikvaren og Norsk kulturråd.  Hovudmålet med prosjektet, som legg vekt på å byggje bruer mellom kulturarvfeltet og relevante forskingsmiljø, er å skape nye forståingar for og synleggjøre kva kulturarv betyr for samfunnet.

Eit anna prosjekt som Kulturrådet har tatt initiativ til, og som det er relevant å nemne i denne samanheng, er På sporet av den tapte samtid. Prosjektet er lagt til Sekretariatet for museas samtidsnettverk på Maihaugen, og har som mål å stimulere til tverrsektorielt samarbeid mellom kulturhistoriske museum og forskingsmiljø.

Bilde: utsnitt av rapporten Museum, Arkiv og Samfunn

Snarveg til dei siste tildelingane