Turné for tidsskrift og sakprosa

I slutten av september går startskotet for formidlingsturneen ”Ikke bare skjønt!” i Tromsø. Målet er å presentere og å skape entusiasme rundt innkjøpsordningane for sakprosa og tidsskrift blant bibliotekarar og bibliotekbrukarar landet rundt. I løpet av hausten skal byane Tromsø, Trondheim, Bergen, Stavanger, Kristiansand, Drammen og Oslo få besøk av sakprosaforfattarar, tidsskriftskribentar, utgjevarar og administratorar som er omfatta av og arbeidar med ordningane.

For både bibliotekarar og lesarar

- Turneen følgjer same mal for dagen på kvart sted. Om føremiddagen blir bibliotekarar i heile regionen invitert til eit seminar om innkjøpsordningane, der det mellom anna blir gitt døme på god formidling ved at ein innkjøpt forfattar under sakprosaordninga presenterer sitt prosjekt, fortel Arne Vestbø, rådgjevar i Norsk kulturråd og koordinator for turneen.

Om kvelden opnar biblioteka opp for publikum, og får slik vist seg fram som gode arenaer for litteraturformidling. Her vil sakprosaforfattarar og tidsskriftutgjevarar presentere sine prosjekt gjennom føredrag, debatt eller samtale om eitt tema, som til dømes kan vere sport, litteratur, natur eller myter.

Lovar gode namn

- I skrivande stund blir det inngått avtalar med dei forfattarane og tidsskrifta som skal vere med på turneen, og det er solide namn som blir å finne på programmet, lovar Vestbø. Rådgjevaren seier vidare at turneen kan utvidast til fleire byar dersom han viser seg å bli ein suksess.

”Ikke bare skjønt!” er eit samarbeid mellom Norsk faglitterær forfatter- og oversetterforening, Norsk Tidsskriftforening, ABM-utvikling og Norsk kulturråd.

Kulturrådet har hatt to runder med innkjøp av sakprosa i 2009. Sjå lista over innkjøpte bøker her.